1994 - Fäschtet!
“Der Alkohol ischt - wa dr Tiful dri ischt!”
iner Sunntagspredigt seit der Pfarrer das.
“Geit d’Famili kaputt - isch der Alkohol d’schuld
und wievill Unfäll gits da uf der Strass!
Statt immer nummu z’fäschtu - tiet gschiider embiz bättu
und spändet fer d’Chirchurenovation.
Wier brüüche en niwwi Glogga, - drum sellti d’neegschti Wucha
alli ans Fäscht va iischer Chircha cho!”
Der Pfarrer het das sicher nit so gmeint,
doch am Fäscht da singt die ganzi Gmeind:
REFR:
Fäschtet! Triichet! Ässet! Laffet! liebi Gäscht
scheichet alli zämu nomal i.
Der Pfarrer will vam Bier und Wii de gar kei Räscht
will d’niwwi Glogga furchbar tiiri sii!
Ja ja ja, Fäschtet! Triichet! Ässet! Laffet! liebi Gäscht
scheichet alli zämu nomal i.
Vam Bier und Schnaps und Wii welle wier gar kei Räscht
d’niwwi Glogga müess gizahlti sii!
Ja ja ja ohni Gäld - gits gar nix uf discher Wält!
“Mu müess fer d’Jungu sorge - susch nämunsch nämmli Droge!”
Eso teents bim Füessballverei.
“Will Tschuttu eso gsund isch, - bsunner we mu jung isch,
statt umenander z’laffu, chämet, tschuttet öi!
Ja, chämet cho trainieru - wier tie das finanzieru.”
Doch das git der Kassa der Räscht.
Doch mu weiss ja was rendiert - mu organisiert
es Riesu-Summernachtsfäscht!
Die ganzi Gmeind isch da derbii
sogar d’Jungschtu stimmunt alli i:
REFR:
Fäschtet! Triichet! Ässet! Laffet! liebi Gäscht
scheichet alli zämu nomal i.
Der FC will vam Bier und Wii de gar kei Räscht
will Alkohol nit gsund fer d’Jugund sii!
Ja ja ja, Fäschtet! Triichet! Ässet! Laffet! liebi Gäscht
scheichet alli zämu nomal i.
Vam Bier und Schnaps und Wii welle wier gar kei Räscht
alles zämu müess üsglaffu sii!
Ja ja ja ohni Gäld - gits gar nix uf discher Wält!
Äs seit d’Polizii: “Kontrolla müess sii!”
und drum wird sovill kontrolliert.
Und we mu de müess - no zahlu en Büess,
gfrewwt schich d’Polizii:”Das rendiert!”
Denn mu verchunnt ja Provision, - so stigt öi der Lohn,
doch das weckt en schlimme Verdacht:
Dass unner de Gäscht - vam Summernachtsfäscht,
d’Polizii nur zum Schii da mitmacht!
Und we mu de zum Auto geit.D’Polizii ganz frindli seit:
REFR:
Fäschtet! Triichet! Ässet! Laffet! liebi Gäscht
stiiget nummu so ins Auto i!
Vam Bier und Schnaps und Wii finde wier jede Räscht
de chasch de ds Autofahru gat la sii!
Kamillutee
Jetz hän ich lang gnüeg gstudiert,
was sing ich jetz fer es Lied.
Ja jetz hän ich en güeti Idee:
Z’neegscht Lied heisst: Kamillutee!
Hesch dü mal en Riisu-Durscht
und hesch uf es Bierli Gluscht
doch was hilft gägs du Durscht no meh?
Ganz genau: Kamillutee!
Hesch dü Problem mit dum Durchfall
pletzli chunnts mit einum Chnall.
Uf Toilette längts dier längscht nimmeh,
dier fählt halt: Kamillutee.
REFR:
Kamillutee, Kamilutee
ich triichu nur Kamillutee.
Kamillutee, Kamillutee
und scho tüet mier nix meh weh!
Gfallsch dü dier nit wägu diine Haar
schi kiijunt üs und dier wird klar:
En Glatza verchunnsch dü meh und meh:
Striich schi i mit Kamillutee!
Oder fählt’s dier hie an Intelligänz,
fählt’s dier da an der Potänz.
Will dich diini Fröi nimme
probiers mal mit: Kamillutee!
REFR:
Kamillutee......
Zum Ässu keert en güete Wii!
Wer das seit, müess en Dubul sii.
Vill besser passt, ier wärdets gseh:
En Channa voll Kamillutee.
En Super-Fröi het mier mal gseit:
“Jetz bin ich zu allum bireit.
Alls chasch hä, wenn d’willt no meh....”
Doch ich will nur: Kamillutee.
REFR:
Kamillutee......
Meh als es Lied
Ich hä Dier scho lang versprochu
es Liedji va Dier z’machu,
doch so eifach isch das fer mich nit.
Denn alls wan ich fer Dich hä gschribu,
hän ich in du Küder gitribu,
es hundsgwennlichs Liedji passt zu Dier doch nit.
Ich wellti doch soo vill sägu
va Diinum und miinum Läbu
und da längt es churzus Lied halt nit.
Drum wärdisus nie fertigbringu
es Liedji va Dier z’singu,
doch glöib mer min Schatz: So tragisch isch das nit!
REFR:
Denn Dü - bisch vill meh als d’schönschtu Lieder was git
Ja dü - bisch z’Beschta was uf der Wält fer mich git!
Fer Dich - hän ich no nie es Liedji kreiert,
denn dü - bisch vill meh als es Lied!
Jetz hock ich hie scho sit Stunde
der Afang hän ich no nit gfundu,
das Blatt vor mier isch immer no ganz läär.
Ich cha mier das nit erkläru,
z’schriibu “Ich hä di gäru!” -
Gopfridstutz, das isch doch nit so schwär.
Doch ich bringu kei Värs zämu,
drum pack ich miis Schribzig zämu.
Ich stiigu ins Auto und fahru jetz zu Dier.
Ich nimu Dich in du Aaru,
so chan ich mier ds’Liedji sparu.
Ich gschpiru genau: Dü keerscht eifach z’mier.
REFR:
Denn Dü - bisch vill meh als d’schönschtu Lieder was git
Ja dü - bisch z’Liebschta was uf der Wält fer mich git!
Fer Dich - hän ich no nie es Lied komponiert,
denn dü - bisch vill meh als es Lied!
Mitenand
Uf dum Pauseplatz gits en Schlägerii,
nur will eine will der Sterchschtu sii.
Es alts Fröiji wellti uber d’Strass,
doch gar keis Auto laht ira en Chance!
REFR:
Mitenand, statt gägunand!
(Chumm wier gäh doch:)
Hand in Hand, durch iischers Land.
Wenn epper mal nit diiner Meinig isch,
verzellsch allne, dass är nummu en Dubul isch.
Dü bhöiptusch stiif und fescht, dass är gschtohlu het,
nur will är en andri Hütfarb het!
REFR:
Mitenand....
Warum chenne wier nit zämustah?
Warum chenne wier nit zämuhaa?
Warum müess das immer gschtrittu sii?
Warum, warum, das fräg i mi!
Dü schämschti, dass är diine Brüeder isch,
nur will är bhindrut und im Rollstüehl ischt!
REFR:
Mitenand....
Dr Boozu
Iner Porta der Boozu der gräischut mich a
ine Chräwjie die Ginschet, so bschouwt är mich a.
Ds gigrächut Aftertitschi, das tüet mu sus a.
Zum Gratzug will är nimme gah.
Mim Gütti enginnut der Boozu ds Lidji,
dernaa en Tschurrgetta vam Buttilli.
En Müülettu Jännu in du Bidl ambrii,
är höirut in schiiner Felli.
Der Ettro und Müema und der Gvattermaa
Die Gschwiija, der Neppot und d’Basi sind da.
Schii ferrggunt der Nachttschaaggu ins Schaloppi dri.
Und schickent’nu du Rottu ambrii!
Sport isch gsund
Miine Brüeder der isch sportlich und im FC Natersch dri
mu het mer gseit: Der Erich; tieg jedi Balla i.
Zerzit het är gat Unfall, das chunnt äbu derfa.
Denn är verfählt der Füessball, jetz ligt är im Spital.
Der Erich jäissut:”Das isch Bschiss!”
Denn är het Bänderriss.
Aber äbu:
REFR:
Sport isch gsind, das sägunt alli Lit.
Sport isch gsund, drum mächunt alli mit.
Sport isch gsund, doch Füessball uf kei Fall,
denn wenn die Balla mal verfählsch, de landusch im Spital!
Vill triichu und güet ässu, sind miini Hobbini
doch Sport das chasch vergässu, da bin ich nit derbii.
Sport das isch vill z’gfährlich, alleinzig das isch d’schuld.
Ich bi nit gäru sportlich, nei ich bi vill lieber gsund!
Denn eppis isch doch sunnuklar:
Ohni Sport läb’ ich wunderbar!
Und trotzdem:
REFR:
Sport isch gsund, das sägunt alli Lit
Sport isch gsund, doch ich machu nit mit!
Sport isch gsund, Jede Dokter seit der das.
Und wenn im Sport en Unfall machsch, das zahlt ja d’Chrankukass!
Mu schlaat enandre uf die Zähnt, so isch Iischockey!
Der Lauda der isch fasch verbrennt, äs spinnt der Cassius Clay.
Der Brüeder der het Bänderriss, will är gitschuttut het!
Drum hän ich vor dum Sport so Schiss, drum bin ich öi so fett!
Sport richtut iisch no ds Grund.
Und trotzdem sige das e so gsund!
Aber äbu:
REFR:
Sport isch gsund.....
Tschooli
Ja ich bi immer unfrisiert,
derzüe no meischtens unrasiert.
Zum Coiffeur gahn ich sältu oder nie.
Miis Hemmli passt ze Hose nit,
ds Pulli isch mer zimmli z’wit,
am liebschtu träg ich ganz üsglaatschti Schüeh!
Und wenn ich sottigs üs will gah,
seisch dü mier fasch jedesmal:
REFR:
Ich sig es Tschooli, Tschooli, Tschooli hesch mer gseit.
Tschooli, Tschooli und trotzdem hesch dü Freid.
Tschooli, Tschooli, Tschooli seisch dü mier,
fer dich bin ich es Tschooli, genau so gfall ich dier,
drum bliib ich öi es Tschooli, de blibsch dü bi mier!
Bim Ässu is katastrofal,
ich sudlu eifach jedesmal
uf ds Tischtüech, d’Hose oder de uf d’Schüeh.
Miis Büüchji wagsut immer meh,
abnäh isch keis Thema meh,
ich nimu jetzu länger je meh züe!
Güet ässu und triichu macht doch Freid.
Öi wenn sovill dernäbu geit!
REFR:
Ich sig es Tschooli........
Ich cha eifach nit pünktlich sii,
ds Rendevous isch längscht verbii
oder ich bi de um Stunde z’früeh!
Deheimu isch eis Durenand,
alles liggut umenand.
Die Sauornig lahn ich eifach in Rüeh!
Üfrüümu macht mier gar kei Freid
und dü hesch mier scho tüüsigmal gseit:
REFR:
Ich sig es Tschooli.........
Miini Lieder
Die allerschönschtu Sache
erläbsch wenn Müsig spillsch.
Es härzigs Chinderlachu
oder grossi Sääl want fillsch.
Äs isch schön, dass ich darf singu
hie vor de ganzu Lit
und tüet der Funku springu,
dasch d’Schönschta was doch git!
REFR:
Ich singu miini Lieder
fer dich und öi fer mich
und keersch dü anners lieber
isch mier das gliich.
Ich singu miini Lieder,
bi glicklich daderbii.
Ich weiss genau das Fieber
geit nie verbii!
Hän ich mal der Morelli,
öi das gits hientamal,
de laff ich mier kei Chnelli,
ich leg d’Handorgla a.
Und fahn ich afa spilu
mit miinum Instrumänt.
De bin ich wieder zfridu,
äs geit mer uverschämt!
REFR:
Will de sing ich miini Lieder....
Ich will nix kritisieru
mit miine Liedjini.
Will d’Wält nit reparieru,
nei das chämi mier nit z’Sii.
Doch bringunsch embiz Sunnuschii
inu Alltag sume Lit,
de bin ich uberglickli;
meh will ich gar nit!
REFR:
Nei ich singu nur miini Lieder....